United States or Timor-Leste ? Vote for the TOP Country of the Week !
And there ben also fyge trees, that baren no leves, but fyges upon the smale braunches; and men clepen hem figes of Pharoon. Also besyde Cayre, withouten that cytee, is the feld where bawme growethe: and it cometh out on smale trees, that ben non hyere than a mannes breek girdle: and thei semen as wode that is of the wylde vyne.
And in that feld ben 7 welles, that oure Lord Jesu Crist made with on of his feet, whan he wente to pleyen with other children. That feld is not so well closed, but that men may entren at here owne list. But in that cesonne, that the bawme is growynge, men put there to gode kepynge, that no man dar ben hardy to entre. This bawme growethe in no place, but only there.
Men seyn also, that the bawme growethe in Ynde the more, in that desert where the trees of the sonne and of the mone spak to Alisaundre. But I have not seen it. For I have not ben so fer aboven upward: because that there ben to many perilouse passages.
First zee schulle wel knowe, that the naturelle bawme is fulle cleer, and of cytrine colour, and stronge smellynge; and zif it be thykke, or reed or blak, it is sophisticate, that is to seyne, contrefeted and made lyke it, for disceyt.
And wyte zee wel, that a man oughte to take gode kepe for to bye bawme, but zif he cone knowe it righte wel: for he may righte lyghtely be discoyved. For men sellen a gome, that men clepen turbentyne, in stede of bawme; and thei putten there to a littille bawme for to zeven gode odour.
And some putten wax in oyle of the wode of the fruyt of bawme, and seyn that it is bawme: and sume destyllen clowes of gylofre and of spykenard of Spayne and of othere spices, that ben well smellynge; and the lykour that gothe out there of, thei clepe it bawme: and thei wenen, that thei han bawme; and thei have non.
Aftre take also a drope of bawme, and put it in to a dissche or in a cuppe with mylk of a goat; and zif it be naturelle bawme, anon it wole take and beclippe the mylk.
Word Of The Day