United States or Democratic Republic of the Congo ? Vote for the TOP Country of the Week !
And in maner as wee seyn oure Pater Noster and oure Ave Maria, cowntyng the Pater Nosters, right so this kyng seythe every day devoutly 300 preyeres to his god, or that he ete: and he berethe also aboute his nekke a rubye oryent, noble and fyn, that is a fote of lengthe, and fyve fyngres large.
And whan thei chesen here kyng, thei taken him that rubye, to beren in his hond, and so thei leden him rydynge alle abouten the cytee. And fro thens fromward, thei ben alle obeyssant to him. And that rubye he schalle bere alle wey aboute his nekke: for zif he hadde not that rubye upon him, men wolde not holden him for kyng.
The grete Cane of Cathay hathe gretly coveted that rubye; but he myghte never han it, for werre ne for no maner of godes. This kyng is so rightfulle and of equytee in his doomes, that men may go sykerlyche thorghe out alle his contree, and bere with him what him list, that no man schalle ben hardy to robben hem: and zif he were, the kyng wolde iustifyed anon.
And of gold and sylver, that men beren in his contree, he makethe cylours, pyleres and paumentes in his palays, and other dyverse thinges, what him lykethe. This emperour hathe in his chambre, in on of the pyleres of gold, a rubye and a charboncle of half a fote long, that in the nyght zevethe so gret clartee and schynynge, that it is als light as day.
Word Of The Day