Vietnam or Thailand ? Vote for the TOP Country of the Week !
Mis à jour: 2 juin 2025
La veiz deux anglois capitaines Estre pourriz & consumez En france ont eu bruyt & grant regnes En guerre firent de grans peine Et furent doubtez & aymez Thaleboth & scalles oultrez Furent par accident tous deux Et furent ilz cent foys plus preux
La je veiz de ligny le conte Que de luxembourg se nommoit Des vaillans fut dont on racompte D'accident oncques ne tint compte Et tousjours a luy combatoit Mais debile qui l'ettendoit Au pas pour en prendre vengence L'occist a petite deffence
La fut de sicile le roy D'onneur le droit fruyt & vray arbre Debile l'occist par derroy Et si veiz mort en ce terroy Gisans soubz ung tumbeau de marbre Deux de ses filz ducz de calabre Moult vertueux & renommez Par accident mors & tuez
Le duc de guyenne choisy Gisant tout mort en my la voye Par accident qui l'eut saisy Et de telle mort ou quasi Son nepveu le duc de savoye Le duc jehan que je regrettoye De cleves veiz la mort gesir Que debile avoit fait finer
Touteffois moult marry je fuz Et beaucoup je le regretoye Que je ne veiz tout le surplus Et oultre je m'esbahys plus De ce que riens veu je n'avoye En ce cloistre dont je venoye Des fais de debile le fier Ce cas me faisoit merveillier
Charles duc de bourbon je veiz Par debile mort & maté Et pres de luy deux de ses filz Furent d'accident mors & pris Dont dommaige fut & pitié L'un fut de beau Jeu herité L'autre jacques qui fut puisné Chevallier de moult grant beaulté
La veiz gesir dessoubz les lames Par nombre non a estimer En derrieres roynes & dames Duchesses contesses & femmes Tant qu'on ne les sçavoit nombrer Je me passe de les nommer Mais beaulté haulteur ne vertu Ne a contre la mort rien valu
Deux papes dessoubz ung tombel Je veiz la felix & eugene Ceulx firent ung cisme nouvel Chascun pour faire son plus bel Voult estre pape & avoir regne L'eglise en douleur & peine Mais debile les mist en terre Et fist la fin de telle guerre
La veiz venir une lictiere De deux licornes soustenue Dont l'une fut bonté entiere Et l'autre fut doulce maniere La plus qui fut oncques congneue Toute d'or se monstroit a veue La lictiere & le parement Qui cousta merveilleusement
Au perron ne feis demeuree Ains tiray vers les lices closes Pour ce que je y veiz assemblee Regardans debat ou meslee Ou aulcunes estranges choses La ne fuz minutes ne poses Que je veiz en son eschauffault Atropos seoir au plus hault
Mot du Jour
D'autres à la Recherche