United States or Ethiopia ? Vote for the TOP Country of the Week !
Galathee ma doulce seur ma mye Du bon du cueur/ humblement je te prie Comme cause de mon salut entier Puis que tu es en ce plaisant vergier Que me monstres ta doulce courtoysie Mille baisiers par doulce compaignie Me pourroyent guairir ma maladie Qui de mire a besoing et mestier Galathee ma doulce seur ma mye Du bon du cueur humblement je te prie Comme cause de mon salut entier Acolle moy doulce seur il m'ennuye Puis qu'il convient que mon plaisir te die Je suis pour toy en ung mortel dangier Tant que ne puis ne boire ne mengier Mon ame en toy de tous poins est ravie Galathee ma doulce seur m'amie Du bon du cueur humblement je te prie Comme cause de mon salut entier Puis que tu es en ce plaisant vergier Que me monstres ta doulce courtoysie
S'il vous plaist vendre voz baisiers, J'en achecteray voulentiers, Et en aurez mon cueur en gaige, Pour les prendre par heritaige, Par douzaines, cens ou milliers. Ne les me vendez pas si chiers, Que vous feriez
Encore quant des baisiers mille A mon plaisir me donneras Saichiez doulce et plaisante fille Que pas encor n'estencheras Tout mon ardeur mais le feras Augmenter car feu amoureux Se allume par les plaisans jeux Nonostant belle baise moy Tout mon bien peult venir de toy Tout mon salut/ toute ma joye Sans toy vivre je ne pourroie Plaise toy de mon secourir Si n'est par toy je suis en voie En en grant dangier de mourir
En apres les doulx parlemens Les petiz caquez gratieux Les baisiers les embrassemens Et puis les agreables jeux Les adjournemens des doulx yeulx Le bel acueil les plaisans signes Cent mille souspirs amoureux Et plus de cinq cens mille mynes. Fomentum sceleris michi principiumque dedere Institit ortator hiis michi rebus amor
Je ne prise point telz baisiers Qui sont donnez par contenance, Ou par maniere d'accointance; Trop de gens en sont parconniers. On en peut avoir par milliers, A bon marchié, grant habondance. Je ne prise, etc. Qui sont, etc. Mais savez vous lesquelz sont chiers? Les privez venans par plaisance; Tous autres ne sont, sans doubtance, Que pour festiers estrangiers, Je ne prise, etc.
Trop estes vers moy endebtée, Vous me devez plusieurs baisiers, Je vouldroye moult voulentiers Que la debte fust acquictée; Quoyque vous soyez excusée Que n'osez pour les faulx Dangiers. Trop estes, etc. Vous me, etc. J'en ay bonne lectre scellée, Paiez les, sans tenir si chiers; Autrement, par les officiers D'Amours, vous serez arrestée. Trop estes, etc.
Belle, se ne m'osez donner De voz doulx baisiers amoureux, Pour paour de Dangier courroucer, Qui tousjours est fel et crueux; J'en embleray bien ung ou deux; Mais que, n'y prenez desplaisir, Et que le vueilliez consentir, Maugré Dangier et ses conseulx.
Mot du Jour
D'autres à la Recherche