United States or Ecuador ? Vote for the TOP Country of the Week !
And aftre on theise Comaynz regned, that highte Cachas, and sloughe Tympieman, for to be Soudan: and made him ben cleped Melechemes. And aftre, another that hadde to name Bendochdare, that sloughe Melechemes, for to be Soudan; and cleped himself Melechdare. In his tyme entred the gode Kyng Edward of Englond in Syrye, and dide gret harm to the Sarrazines.
Also the cytee of Cayre is righte gret, and more huge than that of Babyloyne the lesse: and it sytt aboven toward the desert of Syrye, a lytille above the ryvere aboveseyd. In Egipt there ben 2 parties; the Heghte, that is toward Ethiope; and the Lowenesse, that is towardes Arabye. In Egypt is the lond of Ramasses and the lond of Gessen.
And toward the partie Meridionalle is Ethiope. And toward the Northe is the desart, that durethe unto Syrye: and so is the contree strong on alle sydes. And it is wel a 15 journeyes of lengthe, and more than two so moche of desert: and it is but two journeyes in largenesse. And between Egipt and Nubye, it hathe wel a 12 journees of desert.
Word Of The Day