United States or Guyana ? Vote for the TOP Country of the Week !
Also in comynge doun fro the Mount of Olyvete, is the place where oure Lord wepte upon Jerusalem. And there besyde is the place, where oure lady appered to seynt Thomas the Apostle, aftre hire assumptioun, and zaf him hire Gyrdylle. And right nyghe is the ston, where oure Lord often tyme sat upon, whan he prechede: and upon that same schalle he sytte, at the day of doom; righte as him self seyde.
And a lytylle thens, 28 pas, is a chapelle, and there in is the ston, on the whiche oure Lord sat, whan he prechede the 8 blessynges, and seyde thus: Beati pauperes spiritu: and there he taughte his disciples the Pater noster; and wrote with his finger in a ston. And there nyghe is a chirche of Seynte Marie Egipcyane; and there sche lythe in a tombe.
And upon that roche, prechede our Lord often tyme to the peple; and out of that seyd temple, oure Lord drof the byggeres and the selleres.
And there oure Lord forzaf the woman of Chananee hire synnes. And before Tyre was wont to be the ston, on the whiche oure Lord sat and prechede: and on that ston was founded the Chirche of Seynt Savyour. And there was wont for to dwelle Helye the prophete; and there reysed he Jonas the wydwes sone from dethe to lyf.
Word Of The Day