United States or Montserrat ? Vote for the TOP Country of the Week !
Ilz sont d'aultres especes de noyaulx/ qu'en quelque bonne terre & beau sollaige que les puissez planter les arbres/ n'en apportent mye les fruictz francz/ ne proprement semblables a ceulx dont en sont yssus les noyaulx/ mais en sont fort abastardis. Ce sont noysilles et noyaulx de toutes sortes de prunes & de heaulmes entaissez: & de gros abricotz.
Car si vous plantez en ung jardin umbreulx les noyaulx de bonnes pesches ou prefigues qui ont creu en beau sollaige de vigne/ le fruict n'en sera pas de si bonne sçaveur/ supposé qu'il sera de mesmes. Et aussi est il des aultres fruictz/ & toutes arbres. Car la bonté de la terre & beau sollaige y sert beaucoup.
Et est icy a noter: qu'ilz sont aulcunes especes de noyaulx qui ameinent arbres: dont les fruictz sont semblables aulx fruitz de celles dont ilz sont yssus: quant on les plante en bonne terre & beau sollaige: ce sont les noues grosses & toutes manieres de pesches: parfigues/ amandes: chastaignes: abricotz menuz & les boys.
Toutes ycelles arbres viennent bonnes & franches de noyaulz plantez par ainsi que la terre: en laquelle on les plante: soit aussi bonne & en aussi beau sollaige: comme celle en laquelle ont creu les fruictz d'iceulx noyaulx.
Mot du Jour
D'autres à la Recherche